أخبار السعودية

[أخبار-السعودية][btop]

أخبار الإمارات

[أخبار-الإمارات][grids]

أخبار الكويت

[أخبار-الكويت][btop]

أخبار قطر

[أخبار-قطر][btop]

ما هي Bitcoin, كل المعلومات عن بيتكوين و كيف يتم التعامل و الشراء بها

من يومين كان فيه خبر إن وزارة الداخلية قبضت على واحد في مصر بيتداول عملة Bitcoin، وردود أفعال الناس كانت منقسمة لقسمين واضحين، قسم مش فارق معاه بنكلة الخبر وعدى عليه مرور الكرام، وقسم تاني من المهتمين بالإقتصاد والتكنولوجيا كانوا ناقمين على وزارة الداخلية وشايفين إن دي ممارسة قمعية كعادة وزارة الداخلية

الحقيقة إن الأمر أعقد من كده بمراحل كتير شويتين، لأن وزارة الداخلية المصرية في تصرفها ده مع عملة Bitcoin بتعمل اللي 95% من وزارات الداخلية في العالم بتعمله في التعامل مع العملة المرعبة دي، العملة اللي ممكن تغير شكل العالم اللي نعرفه هيا وإخواتها في خلال العقود القليلة القادمة.
ما هي Bitcoin
قبل ما ندخل في الموضوع لازم نعرف معلومة مهمة جدا عن bitcoin، إنها أول ما طلعت كانت سعر صرف واحد Bitcoin مقابل الدولار يساوي واحد سنت، النهاردة بعد سبع سنين فقط سعر واحد Bitcoin بيساوي بقى 570 دولار!
يعني لو حضرتك كان معاك من سبع سنين 1000 Bitcoin كان سعرهم 100 جنيه مصري، النهاردة سعرهم ستة مليون ونص جنيه مصري!


حبيت في البوست الطويل ده إني ألخص ماهية العملة العجيبة دي ومثيلاتها وسبب وجودها، العملة دي وشبيهاتها (حوالي ألف عملة مشابهة دلوقتي بس Bitcoin أقواهم من ناحية الإنتشار والتداول بنسبة 93%) ظهروا للنور في منتصف العقد الأول من القرن الواحد وعشرين، وBitcoin تحديدا ظهرت فقط 2009.

فكرة النقود والعملات

النقود أو العملات الطبيعية اللي بنتداولها كل يوم أمرها سهل ومفهوم، البشر اتفقوا منذ زمن بعيد إن بدل ما نعتمد على نظام المقايضة في تقديم خدمات ومنتجات لبعض نعتمد على نظام الدفع بالأحجار الكريمة والقيمة كعملة للتداول، وبعد لما بقى فيه دول وحكومات في زمن أقرب بدأت فكرة تداول العملات أو السندات الورقية اللي بدورها بتعبر عن غطاء حقيقي من الأحجار الكريمة دي موجود في بنوك مركزية وعامة وخاصة، ومؤخرا في العقود القليلة الماضية (تحديدا 1971 لما الحاج نيكسون قرر يفصل الدولار عن الدهب) الغطاء ده نفسه بقى غير ملزم وتم إستبداله بالدولار الأمريكي كغطاء للعملات عالميا.

التطور النقدي

في العشرين سنة الأخيرة ومع إزدياد حجم التجارة العالمية والحاجة لتحويل الأموال بشكل أسرع وتضخم البيع الإلكتروني على الإنترنت، بدأت العديد من الأدوات المالية والوسائط النقدية في الإزدهار والنمو مثل الكريدت كارد ومثيلاتها (رغم ظهورها في 1951)، حيث وصلت العام الماضي إلى 52% من إجمالي حجم المدفوعات في العالم مقارنة بالمدفوعات الكاش، لتكون هذه أول مرة تتجاوز المدفوعات الإلكترونية حجم المدفوعات الكاش.


بداية Bitcoin

"ساتوتشي ناكاموتو" الإسم الحركي اللي ظهر بيه مؤسس Bitcoin لأول مرة في ورقة بحثية من تأليفه مرسلة لخاصة مهندسي الكومبيوتر الماهرين عبر المايل بتاريخ 31 أكتوبر 2008 عن فكرة العملة الإفتراضية وتجاوز مشكلة الإستخدام المزيف والمتكرر لها.
وفي 9 يناير 2009 كانت بداية Bitcoin الحقيقية حيث ظهر الموقع الإلكتروني للنور وتمت أول عملية تحويل Bitcoin في التاريخ يوم 12 يناير 2009، وبنهاية 2009 وتحديدا في 5 أكتوبر كان أول تقييم وسعر صرف لعملة Bitcoin


يعني إيه Bitcoin

العملة المذهلة دي فكرتها ثورية وعجيبة جدا، فكرتها إن مفيش وجود إطلاقا لفكرة الغطاء النقدي، لا ذهب ولا عملات، ومفيش وجود لوسيط زي البنك بين البائع والمشتري مستخدمي العملة الجديدة، ومفيش دور للدولة في تنظيم التداولات بين الأفراد وبعضيهم بالعملة دي ولا فرض ضرائب عليها، وكمان مفيش كارت أو بطاقة هتستخدمها علشان تشتري حاجة بالعملة دي، فقط محفظة إلكترونية على موبايلك أو جهاز الكومبيوتر بتاعك، وممكن تبعت الفلوس بالمايل أو حتى تنشأ QR Code والبائع يستخدمه لتحصيل فلوسه، وأكبر ميزة فيها إنها لا تتطلب منك الإفصاح عن شخصيتك وهويتك ومعلوماتك، يعني ممكن تشتري العالم كله ومحدش يعرف إنك اشتريته!

نقطة الإنطلاق الحقيقية

الإنترنت اللي بنستخدمه في حياتنا كلها واللي الأخ جوجل وأمثاله بيعمله أرشفة ونقدر ندور فيه بيمثل 4% فقط من حجم كامل شبكة الإنترنت! وبيسموه الإنترنت السطحي” Surface Web” ، فيه مستوى أعمق شوية إسمه الإنترنت العميق “Deep Web” وده فيه كل معلومات الحكومات والبنوك والمواقع المشفرة وما شابه، وده مينفعش تدخله غير بشكل مباشر ودايما بيبقى ليه كلمة مرور وما يعادلها، فيه مستوى أعمق بكتير وده تفاحة الإنترنت المحرمة والبهاريز كلها وإسمه الإنترنت المعتم أو المظلم “Dark Web” وده بيبقى فيه تجارة المخدرات والسلاح والإرهاب وجنس القاصرين والإغتيالات بالأجر وكل اللي قلبك يحبه، يعني ممكن تدخل تشتري جرام هيروين ومسدسين وحزام ناسف وتتفق مع قاتل مأجور على إغتيال مديرك بسم السيانيد وبعديها تطلع على surface web تعمل ديليفري لبابا جونز بيتزا بيبروني، وده مينفعش تدخله غير من خلال برامج وسيطة زي TOR وأخواته.
مشكلة Deep Web الأساسية هيا التعاملات المالية والتحويلات، لأن أي تحويل من خلال بنك هيتعرف مين صاحبه وهيتجاب فورا ويتعدم، وموقع زي "طريق الحرير" “ Silk Road” ومؤسسه في فبراير 2011 الأخ “Ross Ulbricht” فك الله أسره بعد لما FBI قبضت عليه وأخد سجن مدى الحياة في أكتوبر 2013 وقفلت الموقع تماما (فتح تاني من كام شهر –بشرى سارة - )، موقع زي ده شهرته إنه "أمازون الحاجات الممنوعة والغير قانونية" لازم تحويلاته المالية تبقى سرية تماما، وخصوصا إنها كانت كتير أوي (15 مليون دولار سنويا)، لك أن تتخيل إن كل التحويلات دي كانت Bitcoin، ولك أن تتخيل سعر صرف Bitcoin بقى كام بعد هذه التحويلات الشيقة العظيمة. يعني العم "روس" كان ليه 600 ألف بيتكوين كعمولة عن المبيعات اللي بتحصل على الموقع (6% عمولة)، وقتها كان قيمتهم بالدولار الأمريكي 600 ألف، النهاردة قيمتهم مليار ومئتين ألف دولار!

الخلاصة 

العبقري مؤسس Bitcoin عمل مجتمع حقيقي موازي لنفس فكرة ونشأة ومجتمع الذهب علشان عملته تبقى زي الذهب (وقد كان)، يعني قال إن فيه عدد 21 مليون وحدة Bitcoin (اللي هيا عبارة عن مجموعة أكواد في الآخر) مخبأة بعناية وحرص في الإنترنت، ولو حد عايز يجيبهم لازم يحل مسائل حسابية معقدة جدا ميعرفش يحلها غير سوبر كومبيوتر متوصل 24 ساعة بالإنترنت، واللي بيدور على Bitcoins بالشكل ده إسمهم " منقبين" “Miners” وإن المنقبين اللي هيلاقوا Bitcoin ويخليها جاهزة للتداول هياخد مكافأة إنه ياخد نسبة من اللي لقاه، على شرط إن مفيش غير 25 Bitcoin بس بيبقوا جاهزين للبحث والعثور كل عشر دقائق، وعدد المنقبين يتجاوز مئة ألف منقب في بعض التقديرات!
21 مليون وحدة دول هيخلصوا كتنقيب حوالي سنة 2050، وساعتها سعر الوحدة هيبقى غالي جدا لأنها هتبقى نادرة جدا.
فكرة الأخ المؤسس إنه لما يربط كل السوبر كومبيوترز دي على شبكة التداول وقاعدة البيانات بتاعت Bitcoins هتخليها سريعة بشكل غير مسبوق، وبالتالي الناس هتقدر تعمل تداولات وبيع وشرا براحتها وبسرعة فائقة، وبالفعل تقييم شبكة Bitcoin الأخير من حيث السرعة مطلعها أسرع من أسرع وأقوى 500 كومبيوتر في العالم متجمعين مع بعض (بنتكلم هنا عن كومبيوترات المراصد الفضائية وناسا وما شابهها وكومبيوترات المراكز البحثية الخارقة)، وده عمره ما حصل في تاريخ البشرية قاطبة.

أين يمكن إستخدام Bitcoin

فيه شركات بتدفع فلوس حقيقية وتاخد حق التداول والمضاربة على تحويل Bitcoins لعملات حقيقية، وبالتالي حضرتك تقدر تشتري Bitcoins دلوقتي حالا بسعر صرف 570 دولار، وتستخدمها في أماكن كتير هنقولها دلوقتي، لما بتشتري من حد بإستخدام العملة دي بيتم تسجيل المعاملة في قاعدة بيانات مجمعة ومعقدة الناس كلها شايفاها (من غير ما تعرف إنتا مين)، مربوطة بآخر تعامل Bitcoin حصل قبليك بنفس الكود وبالتالي فتزوير معاملة Bitcoin شبه مستحيل فعليا، وتقدر حضرتك في محفظتك الإلكترونية تحوش Bitcoins زي منتا عايز.

فيه شركات كتير دلوقتي ممكن تشتري منها منتجات وخدمات بالعملة دي بس أهمهم على الإطلاق Microsoft و Expedia، بيل جيتس طلع في بيان مصور يتكلم عن Bitcoins وإنه مبسوط بيها لأنها هتغير وجه التاريخ وإن كل منتجات ميكروسوفت ممكن تشتريها Bitcoins، أما Expedia فده أكبر موقع لحجز الفنادق وتذاكر الطائرات وإيجار السيارات، وبردوا تقدر تحجز منه Bitcoins مش فلوس كاش، وزيهم حوالي مئة ألف شركة تانية بتقدم نفس الخدمة

بعض الدول أقرت التعامل بالعملة دي بس بشروط زي أمريكا، الدنمارك، أستونيا، ودول تانية، بل وبعضهم أعفاها من الضرائب، بل وبعضهم بقى فيه ATM تقدر تحول منه Bitcoins من محفظتك الإلكترونية فلوس كاش!

نرجع لمرجوعنا 

طب نختم بما بدأنا بيه وهيا إن الداخلية المصرية قبضت على واحد مصري بيتداول Bitcoin، الحقيقة إن فيه دول كتير مرعوبة من العملة دي وبتتجنن على اللي بيتعامل بيها لأنها مش قادرة تتحكم فيها ولا تخضعها للضرائب وممكن يحصل بلاوي وإجرام وإرهاب ومتقدرش الحكومات تتعقبه لأن التعاملات المادية بتحصل من مجهولين بالنسبة لها، مع تأثير الفلوس اللي بتتحرك من غير مراقبة دي على إقتصاد البلد لو حجمها كبر، بس قريب الحكومات دي ومصر نفسها هتضطر تتسامح مع الموضوع ده وتوجد له حل (زي ما عملت مع أوبر وكريم وقفلت حساباتهم كده :) )، وعامة حتى الدول المتسامحة مع Bitcoin عاملة كده لأنها مش قادرة تحكمها وبتحاول تكسب ناسها لغاية لما توصل معاهم لحل أو طريقة لإحتواء العملة دي

بالمناسبة اول سعر صرف اتحدد لعملة Bitcoin قدام الدولار كان متحدد بناء على معادلة معقدة حسبت إجمالي تكلفة الكهرباء اللي جهاز الكومبيوتر بيستخدمها علشان ينشأ عدد واحد Bitcoin :)

وبالمناسبة بردوا المؤسس المجهول من أقل من شهر طلع واحد أسترالي إسمه Craig Wrightوقال إنه هوا، بس لسه فيه تحقيقات وتأكيدات بتحصل عشان تأكد الكلام ده أو تنفيه.

ليست هناك تعليقات: