أخبار السعودية

[أخبار-السعودية][btop]

أخبار الإمارات

[أخبار-الإمارات][grids]

أخبار الكويت

[أخبار-الكويت][btop]

أخبار قطر

[أخبار-قطر][btop]

بأيدينا نُضعف صحتنا و صحة أبنائنا, مقال رائع, لا تفوّته

اللي بيضرب حقنة هروين، في خلال شهور أو سنين قليله (لو محظوظ) حياته بتكون غالباً يا إنتهت، يا إتدمرت. سهل قوي إن كلنا نسلم إن الهروين حاجه سيئه..مش هتلاقي خلاف أو جدل حقيقي. لما ندخل في أنواع مخدرات أخف..ممكن نبدأ نلاقي ناس بتدافع..وناس مش مقتنعه..وناس بتجادل أكتر...وصحيح فيه أنواع مخدرات أليفه مقارنة بالهروين وتأثيرة المدمر...إنما بيتهيألي إن معظم العقلاء هيوافقوا على إن أي حد ماعندوش إدمان مخدرات، غالبا أفضل حالا بكتير من لو كان قضى نفس عمره ده، بيبرشم، أو بيبلبع أو بيضرب بانجو بشكل يومي.

إدمان الكحول، برضه سهل إنك تحكم عليه بوضوح...السكر الشبه اليومي ومشاكله، وعلى المدى البعيد الأذى اللي بيحصل للكبد، وللصحه العامه..غير كمان إحتمالية الموت بتسمم من الإفراط في الكحول..كل ده بيخلي الموضوع ماعليهوش خلاف.
السجاير..مافيش حد بعد 30 سنة تدخين، أحسن من لو كان عمره ما دخن..الآثار واضحه وأكيده...يا صعوبه في التنفس، يا حساسيه في الصدر، يا تقلب مزاجي وصداع، يا إما لا قدر الله الأسوأ من ده كله.

سهل قوي نشوف الPattern الواضح جدا...مش كل مدخني السجاير بيجيلهم سرطان، ولا كل مدمني الهروين بيموتوا أوفر دوز، ولا كل مدمني الكحول بيموتوا بتسمم كحولي..لكن كله بيدفع التمن بشكل أو بآخر.

على الأقل المجتمع بيحذرك من الحاجات دي..على الأقل الحاجات متصعبه مجتمعيا - أو قانونيا أو حتى دينيا - وبتدفع تمن إجتماعي باهظ في بعض الأحيان لو بتعمل الحاجات دي، وده ممكن يثنيك عنها أو يخليك تراجع نفسك.

لكن فيه pattern تاني في منتهى الوضوح، ماحدش بيحذرك منه..ومالوش تكلفه إجتماعيه، مع إنه بيدمر وبيعمل أكتر من أنواع الإدمان السابقه، وهو الأكل.

لما تاكل أكل مصنع، وفيه زيوت مهدرجه ومنتجات حيوانيه وسكر ومواد إضافيه، النتيجه هي أمراض زي القلب، والسكر، والضغط، والأمراض المناعية، والجلطات.

الPattern واضح وضوح الشمس..آدي طريقة أكلنا، وآدي الناس اللي بتاكل كده بقى لها 30 أو 40 سنة أو أكتر.

يمكن أول بطاطسايه محمره مش بتكححك زي أول سيجارة، وأول سندويتش سكلانس مش بيغيببك زي أول حقنة هروين، أو حباية ترامادول..بس زي السجاير والمخدرات، النتائج أكيده..إعمل كده عشره، عشرين، تلاتين سنة..وهتجني اللي زرعته.

الناس بتحب دايما تتمسك باللي ممكن يخليها تعمل عاده سيئه بيحبوها، لفترة أطول..فدايما تركز مع جدك اللي كان بياكل الصبح صفيحة سمنة بلدي على الريء، وعاش لغاية 100 سنة..وعمك اللي كان بيشرب خرطوشة السجاير في يومين، بس صحته كانت عال، وبيجري ماراثونات.

وكأن دول القاعده، مش الإستثناء...وكأن باقي عيلتك اللي بيتصرفوا كده، ماجالهومش بلاوي الدنيا والآخره بسبب تصرفاتهم.

الخدعه التانيه الأكبر، هي إنك تتصرف نفس التصرفات دي، وتاكل نفس الأكل، وتصلح الموضوع من على الوش، برجيم كل فترة، أو رياضه عنيفه، وتقول أنا كده تمام، أنا في السليم، أنا وزني مظبوط، وتاخد ده على إنه ترمومتر الصحه.

صحيح الوزن الكبير مشكله وبيجيب أمراض لا حصر لها، إنما الوزن المضبوط مش دليل على إن صحتك كويسه...فيه تعبير بقى معروف دلوقتي بره إسمه Thin on the outside fat on the inside...وترجمته الحرفية، رفيع من بره وتخين من جوه...لأن فيه ناس صحيح ماعندهاش دهون كتير، لكن توزيعة الدهون اللي عندها بتحيط بالorgans بتاعة الجسم، وبتعمل مشاكل صحيه زي اللي عنده سمنه..فتلاقي إن أكتر من تلت اللي بيعانوا من السكر، وزنهم مثالي أو قريب منه، والنسبة أكتر من كده كمان في أمراض القلب والشرايين.

مش الإفراط في الأكل هو كل المشكله...بص على كل أهلك المرضى..هل معقول كلهم مفاجيع؟...مش قلة الرياضه هي كل المشكله..صحيح الرياضي أحسن حالاً من الغير رياضي..لكن مش بكتير، وبرضه على الأربعينات أو الخمسينات، بيبدأ يصاب بنفس الأمراض ونفس المشاكل.

المشكله في الأكل نفسه..هتاكل كده...كمان 30 أو 40 سنة هيحصلك كده...Pattern واضح وصريح، نفس وضوح وصراحة Pattern الإدمان، أو التدخين أو الكحول.

الأسوأ من ده كله، إننا بنعمل كده مش بس في نفسنا، إنما كمان في عيالنا..مافيش أب ولا أم في الدنيا بيدي إبنه سيجاره وهو صغير عشان يبدأ له عاده هتبهدله في حياته كمان عشرين، تلاتين سنه..ولا بيدوا لعيالهم مخدرات، أو كحول..لكن سكر..أكل مصنع..منتجات حيوانيه...آه..وطبعاً بحسن نية جدا، وكتير بضغط كمان على الأطفال لأن ده على حد معلوماتنا ومعلومات أهالينا وأهالي أهالينا "من مصلحتهم".

بيتهيأ لي الPattern أوضح من إن حد يحاول يبينه أكتر ماهو باين..واضح إن كلنا بنعمل حاجه غلط..عشان كده كلنا صحتنا بتبوظ..ولو حتى شايفين إن خلاص الوقت إتأخر إننا نغير عاداتنا..بيتهيأ لي اللي عنده أولاد واجب عليه، إنه مايحطش عياله في نفس المغرز اللي إتحطينا فيه..وإنه يجنبهم المصير المحتوم المتكرر اللي بنعيشه إحنا وأهالينا..يمكن مايضطروش يعيشوا تجارب قاسيه، لأفراد من العيله بيتعذبوا كتير في ايامهم أو سنينهم الأخيرة، أو يفقدوا أفراد من العيله سنين قبل أوانهم.

قبل ما تحط حاجه في بقك أو بق حد من أولادك، إعرف الأول تاثيرها على مستقبله إيه..المعلومات بقت متاحه..ماحدش بقى عنده الحجه اللي عند أهالينا.. اللي يمكن لو كان عندهم المعلومات دي كانوا طلعونا كلنا حاجه تانية.
كتبه: مصطفى حلمي على صفحته الشخصية . 

ليست هناك تعليقات: